30 May, 2022 03:26 PM IST | Kathmandu | Gujarati Mid-day Online Correspondent
તસવીર સૌજન્ય: પીટીઆઈ
સોમવારે નેપાળમાં દુર્ઘટનાગ્રસ્ત થયેલા તારા એરલાઇનના વિમાનના કાટમાળની તસવીર સામે આવી હતી. તસવીર આવ્યાના થોડા સમય બાદ નેપાળી મીડિયાએ દાવો કર્યો હતો કે પ્લેનમાં સવાર તમામ લોકોના મોત થયા છે. પ્લેનનો કાટમાળ મસ્તાંગ વિસ્તારના કોબાનમાંથી મળી આવ્યો હતો. પહાડ પર અહીં-ત્યાં વિખરાયેલા મૃતદેહોને એકત્રિત કરવામાં આવી રહ્યા છે. આ કામમાં સ્થાનિક લોકો પણ સેનાને મદદ કરી રહ્યા છે. મોટાભાગના મૃતદેહોની ઓળખ કરવી મુશ્કેલ બની રહી છે.
સોમવારે સવારે 10.30 વાગ્યા સુધીમાં 14 મૃતદેહો મળી આવ્યા છે. બાકીના 6 મૃતદેહોની શોધ ચાલી રહી છે. પહાડની ટોચ પર પટકાયા બાદ વિમાનનો શરીર અને કાટમાળ લગભગ 100 મીટરના વિસ્તારમાં ફેલાયેલો છે. એરપોર્ટ ઓથોરિટીએ જણાવ્યું કે પ્લેન લગભગ 14,500 ફૂટની ઊંચાઈએ અથડાયા બાદ ક્રેશ થયું હતું.
આ વિમાન રવિવારે દુર્ઘટનાનો શિકાર બન્યું હતું. તારા એરલાઇનની ફ્લાઈટ 9NAET નેપાળના પોખરાથી જોમસોમ જઈ રહી હતી. સવારે લગભગ 10 વાગ્યે ફ્લાઈટ અચાનક ગુમ થઈ ગઈ હતી.
આખો દિવસ સર્ચ ઓપરેશન ચલાવ્યા બાદ સાંજે 4 વાગ્યે ફ્લાઈટ ક્રેશના સમાચાર આવ્યા હતા. પ્લેનમાં ક્રૂ મેમ્બર સહિત લગભગ 22 લોકો સવાર હતા, જેમાંથી 4 મુસાફરો ભારતના, 2 જર્મની અને 13 નેપાળના હતા. ફ્લાઈટમાં 3 ક્રૂ મેમ્બર પણ હતા. વિમાન 30 વર્ષથી વધુ જૂનું હતું.
ત્રિભુવન ઈન્ટરનેશનલ એરપોર્ટના વડાએ જણાવ્યું કે “ઘટનાસ્થળે તપાસ ચાલી રહી છે.” નેપાળ આર્મીના પ્રવક્તા નારાયણ સિલવાલે કહ્યું કે “નેપાળની સેના હવાઈ માર્ગે ઘટનાસ્થળે પહોંચી ગઈ છે. બચાવ કામગીરી ચાલી રહી છે.”
આવા પૂર્ણ થયેલા વિમાનની શોધ
રવિવારે થયેલી દુર્ઘટના બાદ ખરાબ હવામાનને કારણે બચાવ કામગીરી ચલાવવામાં મુશ્કેલી પડી હતી, પરંતુ આ પછી પણ નેપાળ આર્મીના હેલિકોપ્ટરે ક્રેશ સ્થળ શોધી કાઢ્યું હતું. માય રિપબ્લિકા અખબાર અનુસાર, 10 સૈનિકો અને બે કર્મચારીઓને લઈને નેપાળ આર્મીનું હેલિકોપ્ટર નરશાંગ મઠ નજીક નદીના કિનારે ઊતર્યું હતું, જે અકસ્માતનું સંભવિત સ્થળ હતું.